Како помина првиот месец од моите 30-ти: Месец на хаос, загуби и издржливост

Поминат е само еден месец откако зачекорив во моите триесетти, и веќе беше вистинско ролеркостер возење. Ќе бидам комплетно искрена, првиот месец од новата бројка не беше некоја мазна транзиција на која потајно се надевав. Наместо тоа, помина со доста лични загуби, неочекувани промени во мојот живот и моменти на хаос што ме разнишаа. Септември фрли многу предизвици кон мене, и буквално имаше денови кога се прашував дали ќе успеам да го издржам ова. Но, на некој начин, успеав. Преживеав. И горда сум што можам да кажам дека низ сето тоа излегов со подлабоко разбирање за мојата сопствена издржливост.

Ако некогаш си се нашол/а во период кога животот ти изгледа како да излегува од контрола, знаеш за што зборувам. Можеби тоа го доживуваш сега, се чувствуваш како секој ден да носи нов предизвик со кој не си сигурен/а како да се справиш. Верувај ми, сум го почувствувала ова многу пати, и навистина не е лесно. Но, преживувајќи го септември, тој бурен месец, научив неколку работи што ми помогнаа, и сакам да ги споделам со тебе.

Прифати дека е во ред да се мачиш

Ова беше една од најтешките лекции за мене. Секогаш се гордеев со тоа што можам да ги држам конците во раце, но понекогаш, животот едноставно не оди според планот. И знаеш што? Тоа е во ред. Мачењето не значи дека си слаб/а; тоа значи дека си човек. Кога септември донесе загуба и хаос, морав да научам да си дадам милост. Морав да си дозволам да ги почувствувам сите емоции, тагата, фрустрацијата, несигурноста, без да се осудувам за нив.

Потпри се на твоите сили

Во тие денови кога се чувствував како да не можам да земам здив, се потсетував на една едноставна вистина: Сум поминала низ тешки времиња и порано, и можам да го направам тоа повторно. Има нешто што дава моќ кога ќе се потсетиме на претходните борби и ќе сфатиме дека секогаш сме наоѓале начин да ги пребродиме. Користи ги тие спомени како доказ за твојата сила. Потсети се дека дури и кога сè изгледа хаотично, ти си направен/а од таков материјал и можеш се да издржиш.

Најди мали радости во хаосот

Кога сè е тешко, лесно е да се изгубиш во стресот. Но, открив дека дури и во најтешките денови, да си одделам момент за да уживам во нешто мало, омилената песна, чаша кафе, прошетка, помага да се промени перспективата. Тоа не ги решава сите проблеми, но те потсетува дека сè уште има нешто убаво што може да се најде, дури и сред хаосот.

Побарај поддршка

Колку и да мислев дека сум независна, овој месец ми покажа дека нема срам во тоа да се потпреш на луѓето околу тебе. Без разлика дали се тоа пријатели, семејство или добар терапевт, да имаш некого со кого ќе разговараш може да направи голема разлика. Понекогаш, само сознанието дека не си сам/а во тоа низ што поминуваш е доволно за да ти даде сила да продолжиш понатаму.

Вчера, на Светскиот ден на менталното здравје, не можев а да не се потсетам на овие лекции и колку е важно да се грижиме за нашата ментална благосостојба, особено кога животот постојано ни носи неочекувани предизвици. Менталното здравје не е само да се чувствуваш добро кога сè оди како што треба, туку и да научиш како да најдеш начин да танцуваш низ бурите, кога ќе надојдат тешки времиња.

Ако и ти минуваш низ тежок период, се надевам знаеш дека тоа се е дел од животот. Тоа е се нормално и треба да веруваш дека ти си многу посилен/а отколку што мислиш. Бурите ќе надоаѓаат, но ќе дојдат и моментите на јасност, малите победи и сознанието дека преживеа уште еден ден.

Ајде да го прифатиме хаосот, да ја пронајдеме силата во себе и да продолжиме да чекориме напред, чекор по чекор. Затоа што секој тежок момент е можност да научиме нешто ново за себе, да изградиме нова верзија од себе и да бидеме уште поподготвени за секој нов предизвик што ќе дојде.


Искрено ваша,

Лори 💫